និមិត្តរូបតំណាងក្រុមហ៊ុនរបស់អង់គ្លេស ក្រុមហ៊ុនMcLaren បានបង្ហាញជាផ្លូវការនូវរថយន្ត W1 ដែលជាអ្នកស្នងតំណែងពីរថយន្ត F1 និងរថយន្ត​ P1 Hypercars ដែលជារថយន្តបំបែកកំណត់ត្រា។ គ្រោងនឹងចេញលក់នៅឆ្នាំ 2026 រថយន្ត W1 មានលក្ខណៈពិសេសគួរឱ្យចាប់អារម្មណ៍ និងបច្ចេកវិជ្ជាទំនើបទាន់សម័យ ទោះបីជាសមត្ថភាពរបស់វាគឺស្ថិតនៅប្រកៀកគ្នាជាមួយនឹងម៉ូដែលថ្មីៗផ្សេងទៀតដូចជា 750S ក៏ដោយ។

ជាមួយនឹងតម្លៃចាប់ផ្តើម 2.1 លានដុល្លារ និងដំណើរការផលិតមានកំណត់ត្រឹមតែ 399 គ្រឿងប៉ុណ្ណោះ រថយន្ត W1 គឺនៅតែផ្តាច់មុខដូចរថយន្តជំនាន់មុនរបស់វាដែរ។ ថ្វីត្បិតតែវាមានតម្លៃខ្ពស់ខ្លាំងក៏ដោយ ក៏រថយន្តនេះត្រូវបានលក់ចេញយ៉ាងឆាប់រហ័សមុនការប្រកាសរបស់ខ្លួនទៅទៀត ដោយបង្កើតជាសំណួរថាតើលក្ខណៈពិសេសរបស់វាអាចរក្សាកេរ្តិ៍ដំណែលរបស់ McLaren បានដែរឬទេ។

ថាមពលនិងសមត្ថភាព

McLaren W1 ត្រូវ​បាន​ផលិត​ឡើង​សម្រាប់​ថាមពលសុទ្ធសាធ​ដែល​មាន​កម្លាំង 1,258 សេះ និង​កម្លាំង​បង្វិល 988 lb-ft។ ដោយយកគម្រូរចេញពីបច្ចេកវិជ្ជា Formula One រថយន្ត Hypercar មួយនេះបានរួមបញ្ចូលនូវសមាសធាតុ 3D-printed ទម្ងន់ស្រាល និងលក្ខណៈ aerodynamic ដែលបង្កើតកម្លាំងសង្កត់ចុះក្រោមចំនួន 2,205 ផោនក្នុង “Race” mode ។ នេះ​បើយើងបកប្រែ​ទៅ​ជា​សន្ទុះល្បឿន ​ពី 0-60 ម៉ាយក្នុង​មួយ​ម៉ោងគឺ​ត្រឹម​តែ 2.7 វិនាទី​ប៉ុណ្ណោះ ហើយ​ល្បឿន​កំពូលកំណត់ដោយ​អេឡិច​ត្រូនិក​គឺ 217 ម៉ាយក្នុង​មួយម៉ោង។

បច្ចេកវិទ្យា Hybrid

រថយន្ដនេះជារថយន្តអគ្គិសនីកូនកាត់ Plug-in Hybrid (PHEV) ហើយប្រព័ន្ធ Hybrid របស់ W1 មិនផ្តោតសំខាន់លើប្រសិទ្ធភាពប្រើប្រាស់ប្រេងនោះទេ។ ជំនួសមកវិញ វាជួយបង្កើនសមត្ថភាពរថយន្ត ដោយប្រើប្រាស់ម៉ូទ័រអេឡិចត្រិច ដែលបានរួមចំណែកបន្ថែមកម្លាំង 342 សេះ និងកម្លាំងបង្វិល 324 ផោន-ហ្វីត។ ទោះបីជាយ៉ាងណាក៏ដោយ ចំងាយដែលអាចបើកបរបានដោយប្រើអគ្គិសនីសុទ្ធ ត្រូវបានកំណត់ត្រឹមតែ 2 ម៉ាយប៉ុណ្ណោះ។ ឆ្នាំងសាកកម្រិត 2 អាចបញ្ចូលថ្មរហូតដល់ 80% ក្នុងរយៈពេលប្រហែល 20 នាទី។

វិស្វកម្មគួរឱ្យចាប់អារម្មណ៍

បេះដូងនៃរថយន្ត W1 គឺជាម៉ាស៊ីន V8 ចំណុះ 4.0 លីត្រ ដែលផ្តល់កម្លាំង 916 សេះ។ ថាមពលនេះត្រូវបានគ្រប់គ្រងតាមរយៈប្រអប់លេខស្វ័យប្រវត្តិ 8 វគ្គ dual-clutch បំពេញបន្ថែមដោយប្រព័ន្ធហ្វ្រាំង Hydrolic កម្រិតខ្ពស់ដែលមាន pistons ចំនួន 20 ដែលអាចបញ្ឈប់រថយន្តពី 124 ម៉ាយ (200 គ.ម) ក្នុងមួយម៉ោងត្រឹមរយៈចំងាយតែ 328 ហ្វីត (100 ម៉ែត្រ) ប៉ុណ្ណោះ។

សេចក្តីសន្និដ្ឋាន

ខណៈពេលដែល McLaren W1 បង្ហាញពីលក្ខណៈពិសេសគួរឱ្យចាប់អារម្មណ៍ និងការរចនាដែលផ្តល់កិត្តិយសដល់កេរ្តិ៍ដំណែលការប្រណាំងរបស់ម៉ាកនេះ វាប្រឈមនឹងការប្រកួតប្រជែងដ៏តឹងតែងពីគូប្រជែងដូចជា Venom F5 និង Bugatti’s Tourbillon នាពេលខាងមុខ។ លើសពីនេះ រថយន្តដែលដំណើរការដោយអគ្គិសនីពី Rimac, Lucid, Czinger និង Tesla ប្រហែលជាមានល្បឿនលឿនជាងរថយន្តនេះ។ ទោះជាយ៉ាងណាក៏ដោយ W1 សន្យាថានឹងជាការបន្ថែមដ៏រំភើប និងរហ័សរហួនដល់ត្រកូល McLaren ដែលកំពុងបន្តកេរ្តិ៍ដំណែលរបស់ Bruce McLaren ។

អត្តបទដោយខ្មែរខាស៍ដៀល